भातुकलीच्या खेळामधली - मंगेश पाडगावकर
भातुकलीच्या खेळामधली राजा आणिक राणी
अर्ध्यावरती डाव मोडला, अधुरी एक कहाणी
राजा वदला, "मला समजली शब्दांवाचुन भाषा
माझ्या नशीबासवे बोलती तुझ्या हातच्या रेषा"
का राणीच्या डोळां तेव्हा दाटुनि आले पाणी?
राणी वदली बघत एकटक दूरदूरचा तारा
"उद्या पहाटे दुसऱ्या वाटा, दुज्या गावचा वारा"
पण राजाला उशिरा कळली गूढ अटळ ही वाणी
तिला विचारी राजा, "का हे जीव असे जोडावे?
का दैवाने फुलण्या आधी फूल असे तोडावे?"
या प्रश्नाला उत्तर नव्हते, राणी केविलवाणी
का राणीने मिटले डोळे दूर दूर जाताना?
का राजाचा श्वास कोंडला गीत तिचे गाताना?
वाऱ्यावरती विरून गेली एक उदास विराणी
" Bhatukalichya Khelamadhali Raja Aanik Rani Mangesh Padgaonkar "
" Yeshwant Dev "
" Arun Date "
0 Comments